Skútustaðakirkja.

 Í fornum fræðum er sagt að Skúti Áskelsson hafði fyrstur byggt Skútustaði og viljað ná sveitarvöldum við Mývatn. Heimildir eru fyrir því að 1318 var kirkja að Skútustöðum –Ólafs-kirkja hins helga. Árið 1447 er þess getið að jörðin Hrakströnd sé í Skúrustaða þingi.

 Skútustaðir eru gerðir að prestssetri 1856 og samkvæmt lögum frá 1880 heitir prestakallið Skútustaðaprestakall, en áður nefnt Mývatnsþing. Þó staðarkirkjan hafi í upphafi verið bændakirkja hefur hún lengi verið í eigu safnaðarins. Sú kirkja sem nú prýðir staðinn var byggð 1863 og var kirkjusmiður Þórarinn Benjamínsson frá Efri-Hólum. Hundrað árum síðar fóru fram á henni verulegar viðgerðir og síðar hafa verið gerðar á henni ýmsar endurbætur, skipt um þak og glugga og fleira. Kirkjan átti eitt sinn mikil ítök til afrétta og 1712 er þess getið að hún eigi skóg allan í Arahvammi og Grænavatnslandi en skógar þessir voru þá orðnir mjög eyddir.

 Kirkjan á merka gripi, svo sem altaristöflu, sem álitið er að sé frá 17 öld og ljósahjálm úr kopar, sem kom í kirkjuna í tíð Þórunnar ríku og er talinn hinn merkasti gripur. Á árunum 1962-1992 má segja að kirkjan hafi hreinlega verið endurbyggð. Grindin fúabætt og styrkt, einangruð og heilklædd utan sem innan. Þak endurbyggt, steypt gólfplata og síðanlögð timbri. Að innan var reynt að notast við frumklæðningu (spjaldþil) með nýjum innstokkum þar sem þess gerðist þörf.