Svalbarðskirkja í Þistilfirði. Fyrstu heimildir fyrir kirkju að Svalbarði eru að þar hafi 1318 verði kirkja helguð Pétri postula. Hún er þá talin eiga allt heimalanda, Hermundarfell og Brekkukots, sem kirkjan hafði tekið í arf eftir Ara prest, sem er hinn fyrsti nafn-greindi Svalbarðspresta. Þess er í heimildum getið að tekjur hafi kirkjan í fisk-tolli um öll Svalbarðsþing. Bænahús voru í Kollavík, að Garði, á Bægisstöðum, á Hafursstöðum, á Ytra-Álandi og á Gunnarsstöðum, jörð sem Möðruvallaklaustur keypti 1378 vegna rekavonar. Þess er í annálum getið að séra Jóhann Kristjánsson, sem fékk Svalbarð 1735 hafi hýst staðinn svo vel að til var jafnað og reist veglega kirkju, sem stóð uns framkvæmdamaðurinn, séra Vigfús Sigurðsson, reisti núverandi kirkju árið 1848. Á 100 ára afmæli hennar voru gerðar gagngerðar viðgerðir og er hún nú hið prýðilegasta hús. Prestssetur hafði verið um alda raðir að Svalbarði, þar til 1907 að Presthólaprestakall er lagt niður og Ásmundarstaðasókn lögð undir Svalbarð. Árið 1927 er byggð kirkja á Raufarhöfn og messað þar í fyrsta sinn 1.janúar 1928. Prest-setrið sem áður var að Svalbarði var þá lagt niður og flutt til Raufarhafnar. Nú þjónar Þórshafnarsóknarprestur Svalbarðssókn. Margir merkir prestar hafa setið og þjónað að Svalbarði og við misjafnar aðstæður og getu, en prestlaust varð nokkuð oft.
|