Almennar upplýsingar

Söguágrip

Gufunes er nesið austur af Viðeyjarsundi, suðvestan Eiðsvíkur. Gufunes virðist snemma hafa orðið sjálfstæð jörð og kirkja er þar komin um 1150 og henni fylgdi kirkjugarður. Gufuneskirkja var lögð niður 1886 en beinin úr kirkjugarðinum voru tekin upp árið 1968 og flutt í nýjan grafreit, sunnar í túninu, vegna byggingarframkvæmda Áburðarverksmiðjunnar.


Árið 1973 úthlutaði Reykjavíkurborg Kirkjugörðum Reykjavíkurprófastsdæma 90, 7 hekturum úr landi Gufuness og Korpúlfsstaða. Í kjölfar úthlutunarinnar hófu starfsmenn KGRP að gróðursetja trjágróður á svæðinu og má víða sjá þess vott, t.d. í holtinu við sunnanverðan Hallsveg. Við jarðvegsrannsóknir á árunum 1973 til 1976 kom í ljós að allstór hluti var ekki grafartækur og þá var gert samkomulag um að minnka svæðið niður í ca 55 ha. Áætlað var að það landsvæði dygði fram á 3. tug næstu aldar.

Fyrst var grafið í Gufuneskirkjugarð í júní 1980 og frá árinu 1983 hafa mun fleiri verið jarðsettir í Gufuneskirkjugarði en Fossvogskirkjugarði, en sá garður er nú útgrafinn, þar eru aðeins eftir frátekin leiði. Á árunum fyrir 1985 hófst undirbúningur byggingarframkvæmda í Grafarvogi, sem brátt varð vinsælt nýbyggingarhverfi. Borgaryfirvöld klipu þá aftur af kirkjugarðinum, sem nú var minnkaður niður undir 30 ha, en jafnframt var Kirkjugörðunum úthlutað 20 ha lands undir kirkjugarð í Stekkjarbrekku, milli Úlfarsár og Vesturlandsvegar. Þannig er staðan í dag og áætlað er að Gufuneskirkjugarður verði útgrafinn (utan frátekið) árið 2015. Fram til 1. júlí 1997 hafa 4.885 grafir verið teknar í garðinum.

Sjá nánar á heimasíðu Kirkjugarða Reykjavíkurprófastsdæma.

Skipulagsbreytingar voru gerðar á Gufuneskirkjugarði í byrjun október 2002, sem felast í því að áður byrjuðu öll svæði á A og svæðisnúmeri en hafa nú fengiðnýjan bókstaf og nýtt svæðisnúmer, en leiðisnúmer er samt áfram það sama.

Gagnvirkt kort af kirkjugarðinum