Hólakirkja er í Laugalandsprestakalli í Eyjafjarðarprófastsdæmi. Hólakirkja var helguð Jóhannesi skírara og þar hefur sennilega verið kirkja frá upphafi kristni á Íslandi. Þar bjó á 17. öld Magnús Benediktsson, viðriðinn eitt af ljótustu glæpamálum þess tíma. Var hann sakaður um morð á stúlku sem fannst látin í Eyjafjarðará og var talin þunguð af hans völdum. Um hann er söguþáttur eftir síra Jónas Jónasson. Hólakirkja var áður útkirkja frá Miklagarðskirkju en 1871 var prestakallið lagt undir Saurbæ. Núverandi kirkja var reist 1853. Yfirsmiður var Ólafur Briem timburmeistari á Grund. Kirkjan er byggð úr timbri með kross á framstafni. Hún rúmar 120 manns í sæti. 1882 var sett loft í kirkjuna fyrir kirkjukórinn, sem nær yfir tvö fremstu stafgólfin. Í kirkjunni er gömul og merkileg altaristafla úr tré með tveimur vængjum. Hlaðinn grjótveggur var umhverfis kirkjugarðinn en hann hefur verið stækkaður nokkrum sinnum. Á Hólum er gamall og merkilegur torfbær í vörslu þjóðminjavarðar. Skammt fyrir sunnan Hóla er Hólavatn, veiðivatn, við það sumarbúðir kristilegs æskufólks.