Saurbæjarkirkja er ein sex torfkirkna sem enn standa á Íslandi. Hana lét Einar Thorlacius prestur reisa árið 1858. Yfirsmiður var Ólafur timburmeistari Briem á Grund, einn þekktasti kirkjusmiður síns tíma. Kirkjan er með sama sniði og velflestar kirkjur voru hér á landi fram eftir 19. öld, en þá tók timburkirkjum að fjölga. Klukkur hanga á stafni sem algengt var. Yfir dyrum er þríhyrna til skrauts, dæmi um nýklassíska skrautlist sem tók að gæta hérlendis á 19. öld. Saurbæjarkirkja var í kaþólskum sið helguð, ásamt guði og heilögum Nikulási, heilagri Sesselju mey, sem var nafndýrlingur hennar. Saurbær var prestsetur til 1931. Kirkjan er nú varðveitt af Þjóðminjasafni Íslands. Klaustur var stofnað í Saurbæ seint á 12. öld, en mun hafa staðið skamman tíma og um það eru litlar heimildir.